Ni Ray Pasaporte (Banat News-Cebu)
CEBU, Philippines - Si Sr. Supt. Patrocinio Comendador, hepe sa Regional Investigation and Detective Management Division (RIDMD) ug maoy tigpamaba sa Task Force Ellah Joy mibutyag kagahapon nga hangtud di makompleto ang mga ebidensya ug pamahayag sa mga testigo dili pa makunsiderar nga suspek ang British national ug Filipina niining asawa kalabot sa maong krimen.
Matud pa ni Comendador nga ang tanang ebidensya nga ilang nakuha niadtong Biyernes sa gabii gikan sa balay sa duha ipadala ngadto sa PNP Crime Laboratory sa Campo Crame.
Sa nasayran niadtong Biyernes sa gabii ang hiniusang puwersa sa Criminal Investigation and Detection Group (CIDG) ug National Bureau of Investigation (NBI) Central Visayas mironda sa gipuy-an sa usa ka langyaw sa barangay Inayagan siyudad sa Naga pinasikad sa search warrant nga giisyu ni Executive Judge Meinrado Paredes sa RTC Branch 10.
Nakuha sa gipuy-an sa duha ang mga computer devices sama sa USB, video camera ug ang usa ka Mitsubishi Pajero nga kolor dark Blue nagtangag sa plakang LMJ-382.
Si Comendador nagkanayon nga sila sa kapulisan dinhi sa Central Visayas walay igong kapasidad sa pagsusi sa mga ebidensya tungod kay wala silay igong kahimanan pagsusi niini.
Wala gyud giklaro ni Comendador kung ang langyaw ug asawa niini mao na gyud ang tinuod nga suspek sa pagdagit ug posibleng pagpatay kang Ellah Joy Pique niadtong Pebrero 8 (usa ka buwan na karung adlawa) kansang patay’ng lawas napalgan sa Barili nianang pagka petsa 9.
Nagdumili pa si Comendador paghatag og dugang impormasyon ngadto sa mga sakop sa media hangtud nga dili nila makumpleto’g kuhag mga affidavit ang mga saksi nga taga Barili, Naga ug Minglanilla.
Duna say nakuha nga report ang Task Force nga tampered ang plate number sa maong sakyanan hinungdan nga dili pa nila matumbok kun ang langyaw ba gyud ang tag-iya niini. Ang PNP Crime Laboratory na usab dinhi sa Central Visayas maoy mosusi sa sakyanan kun duna pa bay lama sa dugo nga posibleng iya sa batang si Pique.
Matud ni Comendador ilang nakita nga mas dunay gibug-aton ang mga nadawat nilang impormasyon sanglit duna silay eye witness, direct witnesses ug giingong dunay nakakita sa wala pa gidagit ug sa dihang gilabay na si Pique didto sa barangay Sayaw.
Si Comendador nagkanayon kun ugaling nga ilang masang-at ang kaso magpatabang sila sa Philippine Center for International Crime ug sa International Police human nakadawat sila og report nga milarga na sa gawas sa nasud ang duha. (EIM) (BANAT NEWS)
